张智霖爆重遇初恋女友被问借钱！15岁儿子魔童正面曝光激似袁咏仪 -

张智霖袁咏仪夫妇北上发展不时大晒恩爱，係内地网民公认嘅模范夫妻。近日张智霖喺《大湾仔的夜》中提及初恋女友，更直言做过最疯狂嘅事就係挽回对方，多年后两人重遇，女方更问佢借钱。

张智霖袁咏仪夫妇北上发展晒恩爱

张智霖同老婆袁咏仪曾经出演唔少夫妻综艺节目，两公婆嘅感情一直好好，大众都认定佢哋係一对恩爱夫妻。最近佢同陈小春、林晓峰、谢天华、梁汉文合作主持《大湾仔的夜》，靓靓都有出动监场。

《大湾仔的夜》张智霖爆曾为挽回初恋女友远飞澳洲

喺新一集张智霖就大爆自己做过最疯狂嘅一件事就係飞去澳洲挽回初恋女朋友！佢表示自己当时年纪细咩都唔识，漏夜搭飞机，落机后仲要搭足9个钟头巴士先去到女友屋企。

张智霖表示佢去之前有同女友联络，但到埗后先发现女友已经搬走。当被问到重新嚟过仲会唔会箍煲，佢亦好坦白：“如果是那个年纪应该会。”

初恋女友移情别恋，多年后重遇问佢借钱！

其实张智霖曾经多次喺访问、节目中大谈初恋，早年佢喺电台节目中提到初恋係佢16、17岁时发生，又指初恋女友似日本女星小泉今日子。

张智霖表示同初恋女友分手原因係对方移情别恋，令佢大受打击直言：“靓仔唔係大晒！”，事隔多年佢于同学聚会中得悉对方嘅联络方式，两人更相约食饭，点知初恋女友竟然问佢借钱：“真係令我好心伤！”

张智霖15岁儿子“魔童”张慕童正面曝光撞样袁咏仪

虽然佢提起初恋，但亦不忘表示自己嘅理想型就係老婆袁咏仪，求生欲满分！张智霖袁咏仪除咗获公认係模范夫妻，佢哋嘅15岁儿子张慕童（魔童）都係大众关注嘅对象。

张智霖曾表示唔想多谈儿子，因为觉得仔仔只係一个普通人，而佢仔仔因为“你问我答”而引起一场风波，最终要由妈妈公开道歉先平息到，事后魔童已甚少更新社交网站。

但最近佢喺IG大晒母子合照，更罕有曝光正面，掀起热议，唔少网友认为佢尽得父母嘅优良基因，颜值爆灯，而且同妈妈靓靓十分似样。